banat-in-sakan

سوالف و مغامرات بنات السكن في جامعه نقط نقط

Saturday, April 08, 2006

عدنااااااا...مع سكن تووون



(لا احد يقرا ..البلوج خرف ويبغاله تعديل


السلام عليكم ...(ولها وجه تسلم بعد؟) ايوة لي وجه احم
طبعا ادري اني زودتها بزياده..بس ايش اقول...حسبي الله و نعم الوكيل من النفسيه والجمعيه والمولوخيه!! قصدي الاجواء السائده المرافقه لمن تكن تساعد على فضفضه ما بداخل النفس والجوف وحفر الباطن بعده بأسبوع و فيوم من الايام سمعنا عن امسيه شعريه كانت بالامريكيه.. الشاعر الرئيسي فيها ..هوالشاعر الكويتي سالم السيار..عاد انا استانست قلت وناسه شعر و خطر قلت يلا ابغى اروح...شفت ولا واحد متحمس فاتحبطت.. بس جت الاخت "مصرقعه" >>عضوه جديده وقالت يلا نروح..صح ان نفسيتي كانت "مش ولا بد" <<<على>.. و جو مكهرب و بالذذذذذذذل لين ما يطلعونا!!... المهم انه الي صار ركبنا شي و اربعين بنت في باص يكفي 28 بنت بس!! لا تسالوني... المس قامت تدخل بنات غصب!! تقول حرام.. اي حرام بس على ناس وناس..لان في بنات من سكن ثاني ما دخلتهم.. المهم..اني طول الطريق حاطه في بالي..اذا الباص لف لفه صغيره ممكن ينقلب بكل بساطه ونتحول شاورما مكسيكي من "ملك الدجاج" المهم الي موتني من الضحك..اول ما ركبنا المس بدتت تهدد..الي اسمع منها سوت حركه.. راح ابلغ عنها و تنطرد من الجامعه..انا قلت نعممممممم؟؟ ايش مفكرين ذولي؟؟ ما شايفيين خير ولا ايش بالضبط؟؟ المهم وصلنا الحمدلله والبنات حاولوا يروحوا هنا هناك..وانا اضحك في قلبي اقول يستاهلوا خلهم يتأدبون... المهم جلسنا انا و رئيسه الندي الكويتي و مصرقعه جنب بعض في النص... على قولتي مكان "استراتيجي" المهم طبعا اصلا اول ما دخلت لباب المسرح انا انصرعت.. الاخ الشاعر ...اول ما دخلنا قال بيت شعر ...مو بس صرخه ابو الصراااااااااااخ!! انا رجعت سبعين خطوه ورا انصرعت!! مو من شي لانه كان هدوء الناس يصفقوا.. وانا الابتسامه "شاقه الحلق" مثل ما بيقلولوا... وفجأه صرخه... اثاري الشاعر انسجم!!! المهم

او ما جلسنا.. لاحظنا انه هم ثلاث شعراء اثنين امارتيين مع الشاعر سالم السيار..واحد من الاثنين "ماشاءالله عليه" خطير في شعره والثاني "الله لا يوريكم" انواع الكأبه والبؤس والملل!!.. شوي و يبكي علينا.. اول شعر له قال..هذا عن واحد كان يحب وحده و بعدين ماتت.. والثاني عن واخوي الله يرحمه...والثالث عن واحد كاتب لامه مادري ايش...المهم كل ما يجي دوره انا اقووول..يالله من مات بعددد؟؟ وطبعا اسلوبه غريب ...تحسونه وهو يشعر ..شوي وينزل تحت الطاوله..يعلي صوته وبعدين يخف يخف ويخف!!! ويختفي..هنا نستوعب انه خلص يعني!! المهم ..المسكين انواع التفشيل.. وفي المسرح انواع المسخره من الشباب..كل مره واحد يقول و يصرخ من بعيد..غزل غزل...غزززززززززززززززززززززل!! !! <<<>> بصوتها الرنان....بس انا كان عاجبني الشعر!! غير كذا ان "المس" كانت جالسه اخر كرسي عشان تراقب البنات من بتطلع ومن بتتحرك..وبما ان عندي خبره في حركات "هالمس" بالذات قلت "لمصرقعه" ..لا تتحركي ترا ذي تتمنى مشكله فاجلسي مكانك.. ومن الملل المسكينه جلست تصور كل شي حتى رجولها يمكن!! ..وإلا وشوي كل دقيقه نتمسخر على الي جالس والي طالع..مثال: شوفي شوفي يلعن ابو الشنب!! شوفي ذي..يلعن ابو الحماس شكلها ام الشاعر اكيد؟؟ سمعي الضحكه بس تجيب المرض.. شوفي المصور تحسيه ينفع زوج "بي بي سي" عاد ما خلينا احد... بس كان وناسه و خطير الجو.. المهم طلعنا ونشوف البنات كلهم هجوم على المطاعم...طبعاً بعد الحصار الي صار...اكيد راح يطلعوا حرتهم بالاكل!! المهم راحت "مصرقعه" وقلت لها روحي انتي انا بجلس هنا!!<<ما>>> ارحمني يا مرافق!! المهم راحت ريمي وعملت العميله الحمدلله وقامت بالسلامه.. والبنات راحوا و زاروها بالمستشفى و تحمدوا لها بالسلامه...بس بعد ان ردت السكن..جلست الاخت كاظمين و قالت ..ترى بدلعها بس اسبوع و ثلاث ايام!!! عاد نحنا قلنا ثلاث ايام؟؟ ليه يعني..قالت مكرمه مني!!! كاظمين و دلع؟؟ عاد قويه شوي.. بس بلعناها!! وطبعاً نحنا نصحنا ريمي تستغل هالايام المباركه الي انعمت عليها بها كاظمين .....المهم مر كم يوم" وما زالت كاظمين تدلع ريمي".. والا و يجيبوا لنا فيديو العمليه..(يوم الاستنتاج العالمي) طبعاً نص البنات ما يبغوا يشوفوا <<<دلع>> ترى الي يضحك في الموضوع ان في بنات يستشيروها في امراض وما ادري ايش؟؟ ...سمعوا السالفه فيها طب خلوها دكتوره من صدق!!! المهم و نحنا نتابع!! كنا نستكشف الاعضاء الي حول المراره..الي تقول شوف ذي المعده؟؟ ونحنا: ااااه ايووووة!! والي تقول شوفوا الكبد!! و ترد كاظمين: ماااااااشاءءء الله الكبده راهيه... وانواع الضحك الاليم... فجأه.. نشوف الدكتور قص المراره!! و نقووول كلنا قصهااااااااا؟؟ عاد ريمي طبعاً "انصعقت" من الصدمه؟؟ وبعدين نشوفه يسحبها و يسحبها لين طلعها برا البطن عن طريق السره!! كيف لا تسألوا! هنا انقلب الوضع مسرحييييييييه... قالت دافوره: مسكينه ريمي ما عندك مراره.. وترد ريمي: لااااااااااااا عندي.. و تقول بدويه : شكله حطها لزوجته الي ما عندها مراره.. وترد ريمي : والله عندددددي!! و انواع التبهديل! و يقولوها سرق مرارتك الدكتور عشان زوجته وانتي خلاص ما عندك مراره خلاص..وفجأه قلبناها جد... وقلنا لها هذا الفيديو دليل للسرقه الي حصلت...روحي افتحي قضيه ووريهم الفيديو... و مسكينه ريمي انواع الصدمات..ماحد رحمها..هو على اساس لمن نشوف الكل يواسها و يتحمد بسلامتها ..بس قلب الموضوع و صار في قضايا بالموضوع السرقه الطبيه.. ! المهم انها بخير و هذا اهم شي


نجي ليوم الغسيل التبهديل العالمي..

ابطال الحلقه: "بنت العم 1(مستحيه)" و مصرقعه
الادوار الثنائيه: محششه...مس كريزي...بدويه.."بنت العم1 (انفصام)" وبي بي سي و دكتوره و رجه
الموقع: غرفه الغسيل

في يوم من الايام العصيبه..كنت جالسه بغرفتي.. ام البرود..واسمع اغاني و ارسم..فجأه اسمع.. طاخ طاخ طااخ على الباب!! قلت بسم الله ايش صار احترق السكن؟؟ قلت من؟ ردت علي "انفصام" وقالت انا فلانه..قلت خير ان شاء الله... <<لان>


هذي كانت صوره للرساله الي اكتبتها الاخت "مستحيه" للبنت الي سوت الجريمه..والي ما عرفنا من هي؟

ترجمه للخط..

"يالتشلبه ما تستحي تحطي ملابسك الدخليه في غسالات البنات.. الصابون بدرهم واحد واذا ما عندك طلبي من المدام و بتعطيك..عيب يالجلبه/الشلبه يالي ما تستحي... اللله يعينك على الككز المفقود.." <<هذا>







..














م






Monday, March 06, 2006

من طلعه الخميس ..لجيه برعي و خميس

سلام يا اخواتي واخواني و بس

اسفه اذا كنت طولت عليكم في عرض الحلقات.. بس ظروفي الصحيه و النفسيه و الإمتحاناتيه ما كانت تسمح اكتب الحلقه هذي(إلا الحين)
بس مثل ما يقولون من طول الغيبات جاب الغنايم!! احم فيعني هالمره جايبه لكم دسته اخبار و "أكشنس" صاروا بالسكن و بناتها.... بس قبل كذا احب اقولكم عن اليوم!! ترى كنت متنرفزه وواصله حدي فسوري لازم اطلع حرتي.. اليوم كان عندي امتحان "برمجه خربطه" والدكتور من اخوان اهل "هكا">>يعني تونسي جزائري شي كذا!!! الله لا يوريكم هالدكتور
اولاً مفهي و في عالم ثاني, ثانياً اعصابه خربانه و باقي له شوي و ينتقل على اقرب فرع مستشفى مجانين!! كل ما يشرح شي يقول فهمتوا "ديد يو اندر ستاند؟؟ إف يو ددنت..أسك!" >> كذاب عاد نحنا ما نصدق فنسأل و أول ما نسأل يقول : " وووووات؟؟ يو دد نت اندر استاند؟؟ >>(( يعني نعمممم؟ ما فهمتي؟؟)) .. يعني بالعقل يا اخ اذا فهمت البنت راح تسأل!! طبعاً اول ما يقول كذا البنت تهون وتقول لالا فهمت فهمت... صارت هالحركه مليون مره بالكلاس... يعني اذا ما يبغى يفهم او ما يبغى احد يسأله ياخي لا تسأل!! المهم...اليوم انا الصراحه انفجرت قال نفس الشي و قلت بسأل (علي و على أعدائي) إلا و اسمع الاخ يتحلطم... ((كيف ما بتفهمي "هكا" نوع أسئله؟؟)) >> للمعلوميه هكا يعني مثل... احم انا طبعاًً سكت بعد ان استوعبت نبره صوته الحاده الي دخلت صميم طبله اذني!! قلت له والله دكتور ما فهمت ولاشي من اليوم!! عاد انا طلعت الي بقلبي والبنات الي معاي يطالعون فيني...يعني رحتي فيها يا بنت! قال نعم!! قلت سوري استاذ بس اقولك الحين احسن من اخر الكورس.. قال انتي بنت جامعه لازم تفهمي "عِليا"؟؟ قلت ايوة بنت جامعه بس مو كمبيوتر!! هنا انفجرالاخ والبنت الي بجنبي قالت زين سويتي... عاد انا بقلبي اقول اذا كان زين ليه ما سويتيه انتي من الأول يا شيخه! قال ما راح اشرح وما راح اعيد ولا شي.... قلت اوكي بس اسفه دكتور اذا ما تبغانا نسأل لا تقول إسئلوا!! ... هو طبعاً جلس يطالع فيني وانا جلست اتصفح الكتاب ببرود ولا كأني مسويه شي.. (و داخل قلبي كنت بموت) بس عدّت على خير... طبعا راح اخذف الماده لان مثل ما سمعت ان الدكتور راح يشوتونه من الجامعه لانه عدى السن... ونحنا بالجامعه كل ما يرفسوا دكتور يعني الدكتور "يبدع" <<>>(المشاعر متخبطه مختلطه)
و متنرفزه بس عادي كووول... بس بكتب يعني بكتب >>> تعاند نفسها

موقع الطلعه(الأصلي): ميركاتو
موقع الطلعه(الفصلي): مول الأمارات
الشخصيات: (عادي ذي صعبه) ... انا, بي بي سي ,الجميله,بدويه, توباكه,كلييين, مس كريزي, يوكو,نتفه,دافوره, و بنات العم2 (مجنونه و هاديه)...

ذاك اليوم كان الجو فيه مو بس يجنن... يموت!! مطر و خطر و كل شي.. كانت يوم الطلعه.. و ميركاتو!! بس نحنا كان ودنا نروح مكان اشرح و احسن فاتفقنا قبل الطلعه بيوم أننا راح نروح مول الأمارات.. عشان نروح (سكي دبي) نتزلج و نلعب بالثلج >>> صح بنات خليج!! المهم طلعنا وطبعا سناريو العد و الذل لين ما نطلع.. اول ما وصلنا ميركاتوا.. على طوووووول على الباب الثاني ..ما شاء الله جيش مو بنات.. عيني عينك.. رحنا و على طول على الامارات مول
اول ما دخلنا... قلنا بنتغدى وكل وحده اختارت لها مطعم .. انا و مس كريزي قلنا نبغى باستا فطلبنا من مطعم قلنا خلنا نجربه.. و بجنب ذاك المطعم كان في ماكدونالدز! (( لو نموت ما نتخلى عنه)) فبعد ان عطينا لبعض نظرات.. عرفنا ان الهدف واحد و طلبنا (فرايز) بس .. وجلسنا ننتظر المكرونه حقتنا.. اول ما شفنا اكلنا من بعيد و اشوف على مس كريزي و اقول لها.. كأنه صغير...قالت اي والله!! زين طلبنا (فرايز) المهم رحنا و جلسنا مع البنات .. واول ما نفتح المكرونه.إلا و نشوف(فاجعه) بقايا صحن مكرونه مو مكرونه الصراحه.. وانا و مس كريزي نطالع بعض.. هذي مكرونه؟؟؟ طبعاً انواع التحمد على اننا طلبنا شي زياده... حاطين لنا ملعقه مكرونه مو وجبه بس اكلناها اكلناها...(( عذرناهم ما يعرفونا بنات سكن))
(على سيره الأكل اتصلت بكفتريا السكن.. ترد علي وحده فلبينيه..سوري مام وي دونط قم ان دلفر طو دا طورم!! (حشى خدمه فاشله..توصيل على حسب المزاج).. قلت لها: عوقي > يعني اوكي.. في قوقاقولا؟؟ قالت.. يس قوقاقولاااا اند بيبسييي!! ) وناسه الفلبينيات...

نرجع لسالفتنا..اول ما خلصنا على طول كلنا رحنا (لسكي دبي) وطبعاً دام "بي بي سي" و "بدويه" تحمسوا لشي يعني انسوووا! ابو النحس... وكنا اول ما راكبين الباص ( الهمر قصدي.. انتوا معاي عالخط) خايفيين من حماسه ذول الأثنين..
لان اول ما قالت بدويه شغلوا الراديوا ..طالع بالباص ما في اصلاً راديو.. والأخت "بي بي سي" كانت تضحك على بدويه .. قلنا لها ليه تضحكين تراكي زيها نحسه...كفايه حماس لا احد يتحمس!!
المهم في "سكي دبي" رحنا ناخذ التذاكر ..ايييش صار؟؟ قالوا لناا حق التزلج مليان وما يصير تدخلون... اذا تبغون ممكن تروحون المكان الي مخصص للعب بالثلج >> 90% منهم اطفال! احم.. طبعاً قعدنا نطالع ببعض ..و قلنا خلاص ما نبغا!! إلا و يصير شي ثاني.. نشوف الأخت "دافوره" تبكي!! طبعا انا جلست خمس دقايق من دون ولا حركه عشان استوعب! سألت "بي بي سي" ها ايش صاير ليه تبكي ؟؟ قالت : تبغى تروح داخل تلعب.. لانها الاسبوع الجاي ما راح تطلع!! >> ( ما شاء الله الإشاعات طلعت في جزء من الثانيه) اول ما شفناها كذت قلنا يلا بندخل و نستانس بالثلج ... وهي تقول لاا مو من كذا بس تذكرت أشياء!! إلا و دقيقتين كل وحده تفتح البوك (المحفظه) حقها و تدفع.. وانا ادفع وريت الاخت "بي بي سي" صوره قديمه لابوي.. قلت لها شوفي ابوووووي ! >> فرحانه $: ,قامت الشطوره و ضحكت!! وانا اقول ليه تضحكيين؟ والله ابوي حلو؟ شووووفي .. قالت ايه حلو (بس وجهها وتعابير وجهها المتكرمشه كانت تقول عكس كذا) قالت لها اييييش؟ والله ابوي وسيم يالخايسه.. قالت انا ما قلت شي.. و دقيقه و تنادي "توباكه" وتقول لها شوفي صوره ابوها.. طبعا الاختين الحبايب اتفقوا علي... قالت توباكه :من هذا؟ و قاعده تضحك؟؟ قلت ابوووووووي لا تضحكييين؟ قالت ايش هالتسريحه الي على جنب!! (( يعني بالله صوره قديمه.. واغلب ابائنا كانت لهم قصات غريبه "قالوا أفروو!يعني )) عاد كلمه من هنا و هناك .. و زعلت ورحت بعيد.. دقيقتين و تصالحنا.. (قالوا يمزحون) احم... المهم عدّت على خير..

المهم دخلنا و كل ما نشوف احد عنده حق التزلج..نتحلطم بس عادي رحنا اشترينا قفازات حق اليد للبرد.. كلنا اخترنا احمر
ودخللنا نختار لبس و قياسات... الكل اخذ جاكيت اسود طويل عادا "بي بي سي و الجميله" بدله هبله لونها احمر و ازرق و ما ادري ايش .... امزح لا احد يزعل... المهم دخلنا و اول ما دخلنا كفخنا البرد!!!و نحنا الي تقول .. يا ويلي ويلاه والي تقول الللللله وناسه ..وإلي تقول رحنا فيها... اول ما دخلنا ما عرفنا ايش نسوي فقمنا نلعب بألعاب للأطفال موجوده هناك!! و بعدين انا و الجميله و توباكخ و مس كريزي و دافوره ..زحفنا تحت مكان مكتوب ممنوع الدخول..بس دخلنا.. طلع في مرايا وما ادري ايش..شكله راح يبنوا متاهه ثلجيه..بس قمنا ننط و نضحك على اشكالنا..(كاننا حراميه) بعد شوي اسمع ضحكه توباكه و مس كريزي..قلت لهم ايش ..تخيلوا ايش يسووا!!! ياكلوا الثلج الي على الحيط!! عاد شكلهم كان تحفه... متنا ضحك و قمنا نتحمد على نعمه العقل .. ولا و سوينا زيهم و قمنا نجرب...(سوري بس انا و مس كريزي ما ننلام ما تغدينا زين) احم المهم صورنا بعض وحنا ميتيين من الضحك.. إلا يدخلوا اطفال و يشوفونا كذا!! حسيتهم خافوا!! بس طلعنا على طول... طلعنا و قابلنا كل الشله الي داخل .. جلسنا في لحظه صمت كل وحده تطالع في الثانيه ..كانها تقول "اوكي و بعدين ايش نسوي ؟؟" إلا ودقايق انا و كمين بنت نأخذ الثلج ونضرب بعض.. والي تركض وإلي تطيح.. شكلنا كان بدعه!!! احلى شي لما وحده تنادي الثانيه و تقول شوفي هناااا ولما البنت تطالع ... تتحول لكومه ثلج>>طبعاً شكلنا كان قمه في الهباله القصوى!! ما عندنا سالفه رحنا نلعب ويا الاطفال و نط معاهم و تسلقنا شي كذا ما ادري ايش يسمونه زي البرج.. و هنا كان المقطع الرهيب.. شفنا الناس الي يتزلجوووون.. و جلسنا نقول لااااا شكلنا كان زي البؤساء!! نشوف الناس يتمتعوا على اصوله ونحنا نرمي على بعض ثلج!! طبعا كل وحده تواسي الثانيه و قلنا يلا ننزل احسن لا نشوف هالمناظر البشعه! اول ما نزلنا اكتشفنا اكتشاف.. في اختراع زي مضرب التنس بس على اصغر و على اعرض و من البلاستك.. هذا الله يسلمكم يجلسون عليه الاطفال .. يتزلجون به, ونحنا دام اننا بنات بإصلاحيه نعرف معنى الاستفاده من كل عرض بالوجود حتى لو نمله ولو عود كبريت.. فأخذنا الزلاجات "المخصصه للأطفال" وإستعملناهم مضارب للكبار!!.. كل وحده اخذت واحد وايستخدمناه كسلاح فتاك.. نجمع الثلج فيه و نضرب!! كان وناااااااااااااااسه! كل وحده كحل عينها سايح للخد من كثر الضرب.. انا عرفت كذا لمن شفت وجه كليين و لمن شفت كيف الأطفال يجوا يركضوا ناحيتنا يبغوا يلعبوا معنا!! و فجأه يغيروا طريقهم!! .. بعدين تحولت الحرب الى اسئله.. انا كحلي سايح؟؟؟ وانا؟؟ زين في شي بوجهي.. زين شعري طالع؟؟ ..إلا هي ثواني و نرجع للهجوم.. و كان هدفنا "كلييين:" طيحناها على الارض و جاسين ندفنها بالثلج و البنات انواع الحماااااس الأليم.. يردموا. و كانت قدامي الاخت دافوره تساعد.. اشوفها شافت علي مستغربه قالت مو انتي الي ندفنك قلت : نعمممممممم؟؟ قالت لا حررررررررررام!! (( يعني عادي تدفني شايفتني لوح الظاهر)) وطبعا جلسنا نتضارب
...الاخت "نتفه" كانت مهمتها التصوير وطبعا المسكينه كل ما توقف تبغى تصور بنتين..تتحول البنتين لعشر!! ( من زين الخشش بس)) وكل دقيقه كل ما تعد واحد اثنين البنات .. لحظه لحظه.. وكل وحده تدعس نفسها عشان تطلع بالصورة.. و الفضيحه الأعظم.. كل ما تكمل "نتفه" العد لين الثلاث وتقول وااااحد اثنيييين ثلااااااااث!! ايش البنات يقولون >>> مو تشيييززز (( يقولون عرررررررريس)) >> اللهم لا شماته .. لا تفكرون اننا متلهفين على الزواج!! لا لا لا واليعاذ بالله >>> (اكبر كذابه) مرت الساعات بسرعه ولاحسينا فيهم.. ولعبنا لعب ممكن تقولون عوضنا فيه كل اللعب الي ما لعبناه بأيام الطفوله ((تعرفون الثلج موجود طول السنه بالخيلج بس الوقت ما سمح لنا إلا الحين)) لما قرب (موعد الرحيل) كلنا طلعنا على غرفه التبديل..طبعا هنا حسينا ان رجولنا و اطراف اصابعنا تجمدت..لان طلعنا من مكان برد مووت الى مكان حار!! فكل وحده صارت تعمل حركات بهلاوانيه.. الي تنط والي تكفخ رجولها والي تصفق!! >> قلت لكم متعودين على هالاجواء! المهم في غرفه التبديل في مكان به "مجفف للشعر" راحت الأخت "توباكه" واستخدمته مجفف للملابس و لليد!! طبعا كانت ردهّ فعل الجهاز وحده<<< ((انفجر)) طبعاً البنات ماتوا ضحك! وهي سوت نفسها عاااادي ولا كأنها مسويه شي!! زين ما احد لاحظ!! طبعاً انا كنت في ذاك اليوم بالتحديد ودي اشتري (هامستر)>>حيوان يشبه السنجاب من دون ذيل... بس البنات قولوا لي اول ما نطلع اذا في وقت نمر ... وكانت الاخت" دكتوره" متحمسه معاي بس ما طلعت معانا .. و "الجميله" كانت تتوعد وتهدد انها راح تذبحه او راح ترميه في "البالوعه" قلت لها بسميه على اسمك او اسم خطيبك عشان لا تذبحيه!! ..رجعنا ميركاتوا! ..وكل وحده تحاول تستغل اخر الدقايق الي تاخذ اكل والي تاخذ من "ستار بكس" والي تدخل اي محل في وجهها بس عشان تشتري... وعلى طول على الهمررررات!!

خلصت الطلعه ورجعنا السكن وانا اتحلطم "ما اشترييييت "هامستر" ما اشتريييت شيييي؟" >> ايدي تحكني اذا ما شريت شي!!.... و قلت للدكتوره ما شرررريت "هامستر" و "بي بي سي" و "الجميله" يقولوا أحسن تبغى تجيبي فار للسكن!! "طبعا انا ما ارضى على الهامستر" قلت: موووو فار اسمه هامستر يا متخلفات.. وهم يقولون: لا فار!!
يوم الأثنين طعلت دكتوره ومس كريزي بتصريح "مواصلات عامه" و اول ما رجعت قالت ...تعالي ابغى اوريكي شي قلت ايش ايش؟؟ >> تحمست! إلا و تفتحلي "مس كريزي"كيس داخله شي صغير ابيض لاااا و يتحرك بعد!! عاد انا انوااع الصراخ والولوله!! قالت لي دكتوره : ايش فيكي ترى "هامستر"؟؟ طبعاً كنت اشوف عليه و انا مصدومه قلت صغييييييييير!!
(( الهامستر عاداً يكون حجمه زي كفه اليد بس هذا كانه محايه طوله بوصتين)) قالت هذا الي حصلناه!! بعد ان استوعبت.. جلست اصارخ هااااااااااا هامستر هامستر... إلا ويطلع لي واحد ثاني!!!هنا انا قلت وناااااااااااسه اصدقاء!! المهم رحنا فوق .. و الهامسترس في اكياس >>> لانه ممنوع احد يجيب حيوانات بالسكن... المهم دخلناهم والبنات ما يدرون.. كل ما نوريه لوحده تضارخ: فااااااااااااار!! وانا لا مو فاااااااااااااااار"هامستر" يا تخلف!!طبعاً توباكه قالت وع!! و بعد دقايق دخلوا افراد شله كاظمين و اخواتها! و بس بمجرد ما عرفوا انه في مخلوق يتحرك صراخ و ركيض على الغرفه!! هنا راحت الدكتوره و توباكه غرفتهم.. و عملوا حركه بيدهم (كأنهم ماسكيين شي) و البنات (ريمي,كاظمين,نونو نت ,دافوره , و الجميله)) يصارخون و الي تطيح على وجهها والي تنط فوق الثانيه والي فوق الكرسي والطاوله!! ..وطبعاً انشز انواع الصراخ الغير متعارف عليه >>> يصلحون انذار حريق... المهم لما شافوا كيف البنات ميتتين من الخوف مع ان ايدهم فاضيه و طول الوقت كانوا يقولون والله مو معنا شي!! .. بس ما صدقوهم..راحوا و جابوا "الهامسترز" و إنعاد الفلم الهندي مره ثانيه
... لما خلص مسلسل (صرخات خوف من الجوف) ركبّنا بيت "الهمسترز" انا و بدويه و رجه و دكتوره...قعدنا نطالع فيهم قلت خلااااااص سميتهم... عاد تحمست دكتوره و بدويه و قالوا ايش؟ قالت ((خميس و برعي)) وقاموا يضحكون.. وقلت كيفي ياخي ابغاهم اولاد.. يعني دخلنا اولاد بالسكن!! وناسه.. و "بي بي سي" قالت ايش دراكي اولاد؟؟ قلت ما يهميني اولاد غصبن عنهم!! طبعا البنات كل ما وحده تدخل تقول: فار فار او تقول وع.. وانا و الأخت دكتوره نستلمهم .. ونلصق روسهم بالجدار لين ما يقولون "همسترز" .. بس كان يوم تاريخي ((خميس و برعي بسكن البنات)) طبعاً هم الحين مع عمتهم بدويه يغيرون جو شوي... مع ان الاخت يوكو...>>روم ميت بدويه ..ما عجبتها الفكره و تقول عنهم فيران شاذه!! و الحلوه "بي بي سي" كانت تأيد الراي و تقول ايوه شاذين..ولدين و بقفص واحد... ((اخوووووان يا ناس)) بس ما احد راضي يفهم.. ما في غير التكفخ هو الي يغير رايهم.. وهذا الي انا و د"دكتوره ماشيين عليه " احم

هذا الي صار من طلعه الخميس لجيه برعي و خميس...
بحط لكم صور اتمنى توضح بعض الاشياء الي صارت غير الي صار :

...

Sunday, February 19, 2006

سميره عشرين ألف.. وألف قصه قبلها!

السلام عليكم...

سوري يمكن تأخرت شوي عليكم!! بس ياخي جالسه اعصر افكاري.. عشان اسردها بشكل مفهوم!! ترى عادي يجي يوم ما احد يفهم مني ولا كلمه ... احم (ما علينا) اليوم راح اكتب عن ثلاث اشياء!! بس بطله الحلقه الأولى سميره عشرين ألف!!! أدري ان الي قرأ الحلقه السابقه >>> (مصدقه فيها كاتبه البنت) ذكرت سالفه سميروه هذي!! بس الحين راح تعرفوا قصتها بالتفصيل المخيط مضبوط!! (بدت تخرف البنت

الحاله الحاليه (الأن) :
ملانه حدي و عادي ارمي نفسي من الشباك في أي لحظه بس جالسه اهون على نفسي و اطلع حرتي هنا .. لا وا حلى شي ..قبل شوي تتصل فيني وحده على الغرفه (جنس رابع ..احم يعني مو لازم افسر اكثر) ..مسكينه البنت غلطانه تتصل علي!! مسحت فيها الارض و الجدار والشبابيك بعد وكان ودي ابلعها التلفون!! والله ترى احم هنا في السكن عندنا مخلوقات عجيبه!! المهم ما علينا اسمع اغنيه (وين احبه الليله) لمحمدعبده >>>> اقول لا يروح فكركم بعيد.. بس الاغنيه طويله تكفي لين ما اخلص !

موقع الجريمه الاولى : الجامعه الامريكيه بالشارقه!

السبب او الهدف : حفل موسيقي لموقطوعات من الاخ (موزار) >>طبعا تعرفوه! واحد من الربع

الشخصيات: بدويه , الجميله و انا! (وبنات بعض السكنات)
وقت حدوث فعاليات الجريمه :الساعه السابع المسا

المهم في يوم من الايام حصلنا إعلان بالسكن عن (حفله موسيقيه كلاسيكسه بالجامعه الأمريكيه)..> ينفع اسم فلم! المهم بس ايش الي فجعني!!! انه ياخذون من كل سكن بس 15 طالبه (إصلاحيه مو سكن)! المهم بدويه كتبت اسمها و اسم بنات العم وبعدين قالت لنا عن العدد المحدد... المهم رحت وطبعا طبعا!! دام اني بسكن طالبات يعني ما شي يتم إلا بالذل! المهم رحت وعرفت انه خلاص تحدد اسماء ال15 بنت من سكنا... عاد انا قلت خلاص تطبق قانون السكن المتداول!! (يا تلحق يا ما تلحق) فإستسلمت للأمر الواقع.. إلا ان حصلت مكان بدل بنت, ما كان ودها تروح , وبعدين اتصلت بالجميله و قلت لها ودك تروحين قالت والله ما نقول لأ ..إلا و نحصل مكان بنت من بنات العم... المهم أسامينا مكتوبه هذا هو المهم....جاء اليوم الموعود و الحفله تبدأ 8 المسا بس الجامعه راح تودينا سبع وشي! اول ما ردينا انا و الجميله من الجامعه جلسنا شوي و بعدين قرب موعد الطلعه و ركضنا على غرفنا نتجهز... (عاد فاتكم الكشخه كل وحده و شنطتها الجديده و الشيله الي تهف ريحه البخور منها و ... اقول احسن اسكت ,, تقول رايحيين برج العرب) المهم اتصلنا ببدويه وقلنا لها يلا نازله؟ قالت إيه يلا انا بنزل..نزلنا و كلنا حماااااااس (عاد نحن صدقنا فيها بنات محبات للموسيقى الكلاسيكيه) رحنا على الباصات قصدي الهمرات المخططه ذي >>> سوري دوم انسى و احاول اتواضع و اقول باصات
طبعا نص البنات الي كاتبين اساميهم هونوا! ما يبغوا يرحون! بس نحنا الثلاثي الكوكباني ضارب فينا الحماس الزايد!!
طبعا قبل لا انسى الاخت المثقفه بدويه كل ما يتصل فيها احد تقوله والله انا رايحه حفله للفنان مواز!!!!! >>> للمعلوميه مواز متوفي من سنه ألف و حطبه (البنت المسكينه كانت نيتها تبغى تبين انها متغربه و جامعيه مو على الفاضي) طبعا نحن ما كنا نعرف ببلوتها السودة إلا لما دخلنا قاعه الحفل وجلسنا... قاعده تسأل وينه ذا مواز؟؟! عاد انا على بالي تتمسخر بس لمن ركزت على ملامح وجهها (انصدمت واصطدمت و تكربت ) بس مت انا و الجميله عليها من الضحك!! ما قدرنا نسكت... احلى ما في السالفه ان في البنات الي كانوا معانا بالباص من اهل الشام الشقيق يخوروووها عيني عينك (يعني هي خاربه خاربه) يقولون كل شي يبغون يسوونه والمس المسؤوله موجوده

شاميه1: بؤليك وليييييي اول ما نودخول على طوول عال كافاتيريااا!
شاميه2: لِك لكااااان .. إي بدنا نروح..
شاميه1: ئالوا موزار ئالوا.. هدول مسدئين إنوا بدنا نسمع مقطوعات هالزلميه!
شاميه2: طب بيئولوا كتتتتير موفيد للعئيل (العقل يعني) و بيزيد الزكاء كتتير ....عاد انا بقلبي اقول (( انتوا ناقصين ذكاء اصلاً )) >>> ما شاء الله يعني

المهم انا و بدويه و الجميله ...نطالع ببعض و نقول وش بهم ذولي .. انواع البروووود!
طبعا اول ما دخلنا في بنات من عند الباب على طوووووول انواع التفحيط والتخميس الأليم و قدام المس لا و المس تقول: دول بيروحوا فييين.. بيفكروني ما بشوفش ولا إيه؟؟ المشكله المس هذي والله كثير طيبه
المهم والاهم.. دخلنا القاعه مثل ما قلت لكم... وجلسنا على جنب و انتظرنا لين ما يبدأ العرض.. طبعا بنت خال بدويه تدرس بالأمريكيه فشفناها و جلست معانا.. وفجأه بدا العرض و جاء واحد يقدم و يقول عن الحفل وعن مواز (طبعا هنا اكتشفنا ان بدويه تفكر مواز بشحمه ولحمه جاي لانها هنا لمن شافته قالت ذا هو مواز >> مسكينه عندها امل انه حي!! المهم بدأ العرض جاؤؤوا مجموعه من العازفين و بدأو يعزفون... طبعاً اول ما سمعتهم يعزفون كنت راح اموت من الضحك... والله كأنه موسيقى (توم وجيري) نحن الثلاثي الكوكباني نفس التفكير و كل وحده منا تهمس لثانيه و تضحك وما في احد يضحك بالقاعه غيرنا.. اهم شي انا ما قدرت اسكت.. لاني جلست اتخيل نفسي بالعبايه ارقص زي راقصات الباليه حولين العازفين ... (حسيت الي قدامي شوي و يكفخوني) بس ياخي الحانهم بايخه!! المشكله نحن مو شكل هالاشياء الكلاسيكه نحنا حق والطبله وعلى وحده ونص بس!! طبعا راسي صدعني والاخت الجميله تقول انا الهبله الي جيت.. وانا اقول لها انا الهلبه اي كتبت اسمك!!طبعا شوي و نطالع بالاخت بدويه وقلنا لها خلنا نطلع.. احم و طلعنا.. لفينا بالكفتيريا...((طبعا الكفتيريا حقتنا اكببببببببببببببببببببببببررررر بكثير طبعاً و مطاعمنا ما تتقارن بمطاعمهم و ستاربكس حقهم وع وع وع مره صغير وخدمه النت (الواير لس) ما منها فايده ابداً )) >>> تواسي نفسها وكله العكس... ما ابالغ اننا كنا عااااااااادي نمشي و نبكي.. ما علينا طبعا ونحنا ماشيين حاولت اواسي نفسي... وقلت ((بلاطنا زي بلاطهم !!! احم) طبعا انوع الاستهبال نمر و يشوفون علينا ونحن وع هالمطعم مو حلو... ولمن مرينا من البولينج قلنا وييي مررره صغير مساكين (ونحنا البولنج حقنا الكره عباره عن قواطي بيبسي و الهدف قطط السكن))... عاد هالرحله كانت تعذيب نفسي مو رحله بلا موزار بلا بطيخ! المهم قرب وقت الرجعه وكلن يتصل بالثاني يلا يلا على الباصات ( قصدي الهمرات) ركبنا الباص إلا و نشوف الفرقه اي تعزف هم وألاتهم طالعن من نفس المكان لي نحن واقفين فيه.. إلا و نقول مس نسلم عليهم بليييز (هم رجال و حريم ..لا تقولون لانهم رجال) >>> نحن نقدر الفن!! المس تقول بس شوي إلا و أنفجار صوتي من الباص و البنات ...تصفيق و تصفير والي تقووول جوووود جوب والي تقول يوووو وز جريت والي والي ..طبعاً كله كذب لان ولا وحده من الي في الباص حضرت الحفل!! ...اكتملوا البنات والمس لازم تعد البنات (مسخره ترى) تأكدت و تحرك (الهمر المخطط) و في بنات شغلوا الراديو وقااااااااااااام الحفل الصح.. ابو الحركات الحركيه .. غنا و تصفيق و المس عادي ما قالت شي ...لان الباص مخفي هذا اولا وثانيا لان جامعتنا تبعد خمس دقايق عن الامريكيه عاااااادي!! و قام الأستهبال ونحن تحمسنا و قعدنا نصفق و نشجع (كان وناسه) دخلنا الجامعه و لما وصلنا لباب الشرطيات قامت المعركه الضاريه (وهنا تظهر نجمه النحس لهذي الحلقه سميروووه) المهم و نحنا بالباص ولمن وصلنا عند باب الشرطيات الي هو المفروض المدخل الرئيسي للسكن.. قالت المس وطوا الصوت.. بعد شوي نسمع ((طبخطخ)) انفجعنا ..إلا ونشوف شرطيه دخلت الباص و تصرخ بأعلى صوتها أيش هالمسخره وطوا الصوت يلا !! وين انتوا بالضبط!!! ردينا باص يعني وين (( اسمحولي في هاللحظه بالذات كلنا تواضعنا وقلنا باص) المهم قالت لا وتردون.. قالت ما تستحون ؟؟ وين المس؟؟ (طبعا المس قالت انا) قالت انتي موجوده وساكته على هالمسخره .. وجودك زي عدمه!! طبعا المس ساكته و بارده ونحنا نقول نحنا بالسكن و كلنا بنات .. والي تقول لها و الباص مخفي ..طبعاً هي تبغى مشكله قالت ما ابغى اسمع منكم شي.. (لانها تفشلت) المهم قالت عقاباً لكم راح تروحون سكاناتكم مشي!! عاد نحنا قلنا ووووي عااااادي متعودين على المشي.. المهم المس في اخر لحظه تكلمت بعد ان قالت الاخت الشرطيه كل اسمايهم ابغاها ((مسكينه تبغى تطلع حرتها)) ونحنا باااااااردين نضحك وهي معصبه! المهم المس قالت لها: على اي اساس تتحكمي بالباص انا المس و انا المسؤوله عن الباص و البنات الي فيه مش انتي؟ وعلى اي اساس بتئولي ان وجودي زي عدمه... هنا قالت الشرطيه : انا ما قلت شيييييه!!
عاد انا قلت لاااااا قلتي و الجميله تقولي انطمي خلينا نسمع!! المهم المس قالت : انا حاكتب تكرير (تقرير) عن الي حصل .. عاد الشرطيه مع الفشله قالت اكتبي إذا تبيين! انا سميرة عشرين ألف!! طبعاً البنات انواااااااااع الضحك!! ايش هذا سميره عشرين ألف .. قامت تبغى ترقع السالفه ..قالت انا سميره وعشرين ألف رقمي العسكري... طبعاً الضحك علا! المهم قالت يلا اطلعوا من الباص... نحنا طلعنا عاااااااااادي كوووول ولا كأن شي حاصل .. الي تمشي و تقول رياااااااضه والله الي تقول هذي تبغى توري الضابط مهاراتها!! والي تقول عاد سميره عشرين ألف ..يعني رقم مميز? ذاك اليوم كان انواع الأكشن.. بس ونحن نطالعها نضحك في وجهها (احسها كانت تفكر ليه ما انطميت احسن) المهم ردينا السكن بأمان و سلامه بس الي زاد الطين بله... جت بنت من بنات العم و سألتنا ها كيف كان (موزار؟؟)) بدويه قالت ها؟؟ قالت لها بنت العم انا عملت ((سيرتش )) عنه بس طلعلي واحد اصلا ميت من زمان؟؟ هنا صراحه حسيت أمعاء بطني راح تنفجر من الضحك!! يعني كفايه علينا بدويه و هفاتها تجينا بنت العم و تعميها!!

هذي هي حكايه سميره عشرين الف!
انتظروا البارت الجاي (السايق سليم و يوم الفالانتاين) >> خطييييييير!

ملاحظه: طبعاً ما ابغى انوه عن شده التواضع الكلي بهالحلقه من كثر ما شفتوا كلمه باصات الي اصلها كلمه همرات
اسمحوا لي هذا التواضع الفذ... ايش نسوي بنات سكن فديتنا!!

مشكورين على تتبعكم :)



Wednesday, February 15, 2006

وما ادراك ما الطلعه

السلام عليكم
(يقولون السلام قبل الكلام) كنت متحمسه و ابغى ادخل عرض

اسفه لاني تأخرت شوي عن الجزء الثالث من مسلسل بنات السكن..بس مثل ما بيقولوا الظروف يا خروف!
راح اكتب اليوم عن طلعتنا ليوم الخميس الماضي و طلعات ثانيه.....>>جايكم الكلام...

راح أبداء بطلعه يوم الخميس (وما أدراك ما الطلعه):


الحاله الحاليه (الآن): اسمع (انا و خلي) لمحمد عبده... ,وحاطه كاب على راسي..>>(لا تطير الافكار)!

الموقع الطلعه: مركز صحارى ( موقع مؤقت)

الشخصيات: بدويه ,مس كريزي , دودة المحششه ( أنا) , رجه , الدلوعه
الوقت : مفروض الساعه 12 بس تحركنا 1 وشي... الرجوع 7:30 . اهم ما في الموضوع ان الوقت كل اسبوع ينقص نص ساعه

احم.. الطلعه كانت لمركز صحارى! الاغلب يعرف انه مركز (كبييييييييييير) وفيه كل شي ...طبعاً فاهميين قصدي >>> العكس!!
المهم قبل الطلعه لازم كل بنت تكتب اسمها اذا تبغى تطلع...واذا نست مثلا تحط اسمها قبل يوم الثلاثاء يعني مافي طلعه
يوم الخميس ((ماشيين على القول يا تلحق يا متلحق))وبما ان هالقانون خلاص تطبق من الكورس الماضي ..اتفقنا ان اي بنت تكتب اسمها تكتب كل اسامي الشله...مسخره ادري المهم جاء يوم الخميس و اغلب البنات ما يبغوا يطلعون لان الطلعه لصحارى وما فيه محلات يبغوها هناك..بس انا والشله الي رحنا الاسبوع الماضي قرننا اننا راح نطلع اصلا من صحارى ... (ترى اغلب البنات يطلعون من صحارى البايخ) المشكله ان المشرفات يعرفون ان كل البنات ما يبغون صحارى و يطلعون برا المول!! ... الله يهديهم بس..
المهم رحنا الباص قصدي (الهمر الأبيض) وانتظرنا حتى تتكرم المس وتعد البنات( روضه صرنا مو جامعه) و اول ما خلصت قالت بنات ترى الرجعه الساعه سبع ونص... (مسكينه ما تدري ان بنات السكن في مثل هاللحظه يتحولوا لوحوش) أول ما قالت كذا والبنات صراخ و ما ادري ايش الي تقول لااااااا والله والي تقول ما اسمع قلتي تسع؟؟ والي تقول مصختوها ترى!! والي تقول ايش رايكم الاسبوع الجاي تمشونا بس (بالهمرز) الباص تقصد!! وطبعا كالعاده تعمل المس نفسها ما تسمع وتقول الي تتأخر تنحرم من طلعه الاسبوع الجاي... المهم الباص تحرك.. و نسمع البنات يقولون والله بتأخر والي تقول ايش هذا كل اسبوع يقصرونها!! بس ترى كلام بنات على الفاضي ,ما شي منه لا تاخير ولا شي!! الي تقول بتتأخر تكون اول وحده بالباص!!

المهم وصلنا صحارى..و اول ما وصلنا على طول على باب التكاسي... انا بس شفت وراي كنت راح اموت ضحك كل البنات من باب ((الهمر)) لباب التكاسي عيني عينك!! المهم انا و بدويه و مس كريزي رحنا بتكسي ..وكانت وجهتنا الأولى لمحل نسخ كتب (مطبعه)!
كانت بدويه تبغى تنسخ كتب..المهم ركبنا التكسي.. وانا اشوف قلت لنفسي هالتكسي مو طبيعي يبغى سالفه..لانه اول ما ركبنا حاولنا نترجم له معنى مطبعه او محل طباعه...

-بدويه: انت في أرف هذا محل مال كوبي كوبي؟؟
-السايق: ايش هذا؟؟
-انا: هذا بووك كوبي مثل كذا سوي ثاني (اخذ الكتاب وا وريه ) ما في ارف وين؟
-السايق: ايس هذا كلام..بوك ستور؟
-كلنا: لااااا!!
-مس كريزي: رفيق كوبينج ستور ..سوي نسخ
-السايق: ما في مئلوم؟
-انا: لاااااااا حوووول
- بدويه: اقول بنات احسن نغير تاكسي!


بعد شوي كنا بنغير التكسي يجي واحد من اصحابه و يشرحله وين المكان..
المهم جلسنا و قلنا الحمدلله عرف اخيراً (انا استغرب ليه كل ما نكلم هنود نقلب نحن هنود) المهم ما علينا ...
جلس الأخ و سألنا انت سعُودي؟ نحنا سكتنا و بعدين قلنا ايوة (مع انه في سعوديه وحده بس بينا) المهم قال اهاااا سعودي ليش ما في غطي وجه!! ليش ما في كَفَر فيس?عاد نحنا متنا ضحك!! قلنا نحن ما في غطي وجه؟؟ قال سعودي في غطي هنا ما في غطي ؟؟ >> (الظاهر متأثر بهيئه الامر بالمعروف) المهم قلنا له لاااا ما في غطي هناك وهنا بس حَجَب (( عاد حَجَب هذي قويه!! يعني محجابات)) المهم قال انا في اشتغل سعودي في رياض كولو غطي!! قلنا نحنا مو من رياض!! المهم قال انا اسم سليم انتَ ... طبعا كل وحده قالت له اسم مستعار انا فاطمه و مس كريزي نوره و بدويه قالت ساره... قال اها زين ..الرجال كان شكله مسكين و على نياته بس انا و البنات استغربنا من شي فيه , هو انه عنده اذن شكله مقصوص!! طبعاً كل وحده جلست تحلل ليه كذا اذنه المسكين.. هو الظاهر لاحظ اننا كنا نشوف على أذنه.. >> (فضيحه نحنا)... بعد شوي يقول هذا انا كذا لان في السعوديه انا سوي حادث!! نحنا هنا اوووووه والله!! و جلس يقول لنا قصه حياته وبعد شوي يطلع صور ويورينا!! كيف
كان شكله قبل الحادث ونحنا عاد عجبتنا السالفه فلم هندي مباشر (لاااايف)! المهم المسكين وصلنا محل الطباعه و بعدها الستي و قالي قبل لا ننزل في اغنيه مال هندي اسموه فاطمه!! انا طبعا نسيت اني كذبت على المسكين قلت من فاطمه!! المهم( وطبعاً الاخت مس كريزي و إبدويه فاطسين علي ضحك)

اول ما وصلنا الستي رحنا تشيليز عشان نتغدى... اول ما دخلنا جاء واحد مصري يشتغل هناك أشر لنا على واحد طووووووووويل و ضخم وقال لنا : إزا عاوزيين اي حاجه هنا الواد (كتكوت) تحت أمروكو؟؟
وطبعا نحنا قلنا مع بعض : كتكووووووووووووت!! (كل وحده فينا تعطي للثانيه نظرات..هذا كله كتكوت!) المهم جاء الاخ كتكوت و قال :أهلا وسهلا عاوزين اي حاجه.. إبدويه قالت له: مش الحين يا أخ كتكوت..بعد شوي
بعد شوي قررنا ايش نبغى.. و طالعنا في بعض..قلت : كيف ننادي هذا الحين.. و تكرمت الاخت مس كريزي وقالت له: كتكوت.. قال نعم أمروكو؟
بس انا ما قدرت ضحكت الصراحه (كلنا ضحكنا) صراحه الاسم مو راكب ابداً.. المهم تغدينا و خلصنا ونحنا كل ما نبغى شي ننادي كتكوت و كتكوت الناس يطالعون فينا (( على بالهم ندلع الاخ))
المهم....
..كنا نبي نشتري اغراض من محلات معينه... بدويه كانت تبغى تشتري سجاده ... الا تبغى تشتريها اليوم رحنا كارفور لان اكتشفنا انه صكوا محل بنات السكن (إيكيا) فدورنا على سجاده,, بدويه حصلت سجاده حلوة بس صغيره كثير قالت بشتريها.. قلت والله حلوة بكم ؟ قالت لي ب ميتين و شي..قلت لها قومي قومي رديها!! قالت ميتين قالت!! على ذي الصغيره.. ومس كريزي قالت ما تسوى ترى في إيكيا احلى, المهم قالت خلاص بردها .. الا بعد شوي راحت وردت و في يدها سجاده اكبر...قلت لنفسي ذي موب صاحيه.. قالت تخيلوا ذي بميه وما ادري كم (المهم ارخص) قلنا لها والله؟؟ زين كيف حصلتيها؟.. قالت انا الصراحه رحت ارد السجاده الصغيره و قلت للي هناك اقول انا بنت مال سكن في ريد ارخص مو هذا غالي.. قالت اثاري الخايس وداني عند السجادات الي مره غاليه!! طبعاً نحن فطسنا ضحك.. .. مر الوقت بسرعه ورحنا نتصل ببعض عشان نرد مع بعض..رحنا عند مواقف التاكسي..وحصلنا (رجه و الدلوعه) هناك ..اهم شي سوينا نفسنا ما نعرفهم .. الي تسلم على الثانيه هلااااا والله ....وينك يا شيخه..من زمان عنك!! طبعاً انووواع التمثيل الاليم.. المهم وقفنا مع بعض و قلنا راح نركب مع بعض نفس التاكسي.. طبعا كان طابور وقفنا تقريباً 7دقايق لين قربنا ... ولما قربنا و فتحوا الباب إلا نشوف الناس يتراكضون ..انا طبعاً وقفت اطالع عليهم و قلت حمااااااااااااااس!! ما صارت تكاسي المهم اخذانا اغراضنا من العربانات بسرعه.. إلا نشوف منظر غير طبيعي .. إبدويه ماسكه السجاده...كان شكلها يفطس ضحك... السجاده اطول منها!!! وهي متحمسه ماسكتها.. المهم رحنا تاكسي إالا و اشوف واحد اجنبي عجوز يدخل ويجلس قدام!! وانا اطالع وصدومه والبنات يلا يلا تاكسي ثاني وانا اقول لاااااا والله ايش فيه هذا حول ما يشوفني جيت قبله!! خليناه و رحنا للتاكسي الثاني وجلسنا ..خمس بنات إلا ويقول الاخ ممنوع خمس!! ونطالع في بعض من يطلع.. رجه و الدلوعه قالوا نحن بنروح بتكسي ثاني!!

ردينا لصحارى كان باقي تقريباً ربع ساعه على موعد التجمع.. بس و نحنا بصحارى كنا نمشي وكل وحده تكتم الضحكه.. كل بنات السكن في يدينهم أكياس محلات مو موجوده اصلاً بصحارى عاد نحن اَشَكره ( بيرشيكا و كارفور وزارا) يعني الغباء!! مو موجودين اصلا فى صحارى... رحنا الباصات بعد ربع ساعه والمس تطالع في الاكياس ونحن نطالع على فوق و لا كأن شي حاصل!! (ياخي هم السبب من قال لكم تودونا صحارى) ردينا السكن الساعه ثمان وشي على بال ما يتجمعوا كل البنات وعلى بال ما تحرك الباص ووصل السكن.. من اول ما طلعنا من الستي لين ما وصلنا السكن و بدويه همها من هم السجاده بس شكلها تحفه وهي ماسكه السجاده ...
دخلنا السكن و كالعاده ..البنات ..ها وين رحتوا ..؟؟ كيف كان؟ ايش صار؟
بعد ان جاوبنا على هالأسئله ( التحضيريه) كل وحده راحت على غرفتها... طبعا انا كالعاده صرخت : ايش اشتريييييييت؟؟ طبعا اشياء شوي و نص المصروف طار في الهوا!! عادي تعودت على هالسالفه :S

بعد كمين ساعه طلعت من الغرفه.. اسمع البنات يلا قومي يا (محششه) البسي اي شي اهبل و غبي!!! طبعاً وجهي تغير و قعدت اسئل نفسي أنا وين؟؟ سألت الاخت يوكو: ايش السالفه ؟؟ تقولي البنات عاملين حفله هلاقه! انا قلت نعم هلاجه ايش يا شيخه ( هلاقه بالكويتي يعني لحجي بالسعودي يعني ما اعرف ايش بالعربي ..هو بإختصار له صله بالأنسان الذي لا يعرف معني للذوق الكشخه والاتيكيت وله معرفه واسعه بحركات و اساليب معيشيه و شكليه غير لائقه بالمجتمع الخارجي >> احلى يا تعريف انتا ) المهم طبعا الي اشترك بالحفل (الهلاقه او هلاجه) او حفل الاستهبال .. الاخت يوكو و إبدويه و كاظمين و توباكه وكليين والجميله و نانسي وبنات غيرهم!
بس الله لا يوركم انووووواع الرعب و الهلاجه... انا طبعاً كنت مو في الموود مثل ما يقولون..فما كان مني الا بس انصدم في حياتي من هالاشكال ...طبعا كل وحده تصور الثانيه و تهدد انها توري الصور لزوج المستقبل ... اول ما شفتهم قلت ياخي انا ما راح انام الليله من هالاشكال... الي لابسه في رجله نعال و في الرجله ثانيه زنوبه حمام و فوقه دلاغ! (سوكس او شرابات) >> اترجم يعني والي لابسه شورت فوق الجينز وعليه جلابيه!!
والي لابسه روب حمام فوق جينز و فوقهم كمين حزام وعلى كاب و فوقه باروكه!! عااااااادي المهم ابو الصدمات ذيك اليوم
وطبعاً كان موقع الحفله هو ((غرفه المذاكره)) او مثل ما نقول نحن ستدي روم >>> ونعم الموقع طبعاً!! ترى نحن بنات سكن نستغل كل موقع أياً كان حتى لو تحتالدرج!! بدأت الحفله على اغاني هابطه بدأً من هيفاء وهبي الى أغنيه ايرانيه ما ادري وش يقولون فيها (شين شوتن شي) ما ادري ليه احسه يسب فيها , عاد كاظمين و هالاغنيه عذاااب الصراحه... تحسها تسبح وتطير وهي ترقص على هالأغنيه!! المهم كان انواع المسخره والأستهبال!! بس الحفله تعتبر ناحجه.. يعني اعتقد الي كان يبغى ينصدم في حياته يشوف اشكال البنات في ذيك الحفله.. انا نفسي انفجعت الصراحه ...يعني اعتقد لو واحد شاف الاشكال الي كانت هناك عادي عاااادي يفكر انه ما يتزوج للأبد!!

المهم هذا كلامي وقصصي لهاليوم...
اتمنى انكم فهمتوا شي من كلامي المتواضع
الحلقه الجايه عن (سميره عشرين ألف) >>> عاد هذي خطيره انتظروها
....!







Tuesday, February 07, 2006

تقارير سريعه

سلام! للجميع

ابغى اليوم اشارككم بشخصيات بنات شله السجن المركزي..
بس قبل لا ابداء ترى اليوم انا مطنشه "الكلاس الاول" عطيته اكبر (طااااااف تربيع في العالم) >> عادي مصطلح فضائي!
الدكتور يجيب لي وسواس قهري و احس اني على نهايه هالفصل بيصير فيني نواتج سلبيه مع شحنات موجبه غير صالحه للتجاذب يعني بالمختصر المفيد ((بتجنن))!! الدكتور هذا درسني ماده في الصيف مو الصيف الماضي الي قبله بعد!! و اول مره نزلت جدولي بالفصل شفت اسمه بجنب ماده من المواد الي اخذتها ..و طبعا جالي ارتجاج في المخ! قعدت اقول لنفسي!! لالا لا مو هو لاااااااه مو هو هذا اكيد واحد ثاني بالانجليزي اسمه غير عن العربي... المهم ما زال الوسواس يطاردني! فرحت للمبني الي هذا الدكتور فيه و جلست ادور عن اسمه واول ما شفت المكتب ما كان فيني إلا أصرخ باعلى ما عندي .. لااااااااااااااااااااااااااااااااااااااااااااااااااااااااااااااااااااااااااااااااااااااا طبعا كانت بجنبي بنت اعرفها بس بعد الصرخه ما ادري وين اختفت... المهم قلت لنفسي يا بنت اركدي ا نطمي الدكتور ما فيه شي (طبعا اكذب على نفسي) المهم حضرت واذا بيييييييييي (انفجع فجعنتاً ليس لها من فجعه) المهم جلس يشرح وانا طبعا جلست ارسم ...لا تلموني ترى هذا الدكتور ابو الملل!المهم فجعه! قصدي فجأه سكت وانا في بالي اقول ايش فيه هذا المتخلف اكيد فيه حاله نفسيه... !!! المهم سكت و بعدين شاف علي وقال انا درستك صح!! انا طبعا تفشلت كل اانواع التفشيل الألييييييييم لان البنات كلهم بالكلاس كانوا يطالعون فيني!!! والله حاله قلت "يس سر" >>> شفتوا الادب بس! المهم قال " آي نو إت..اي دو ريميمبر ماي ستودنتس" >> رممبر الله عدوينك يا شيخ!! المهم عد الكلاس على خير ..... المهم بعد ان افرغت ما في قلبي عن الدكتور...

المهم ببدأ اتكلم عن بنات الشله

اولا ابداء
بكاظمين , نونو نت , ريمي , و دافوره .. طبعا مثل ما قلت بالأول انهم "روم ميتس"
ما عاعرف اقو الجنسيات ولا لأ!
اقول بعدين راح اقول الجنسيات >>>> نحيسه احم

كاظمين: هذي البنت تشوفها تقول ملاك منزل هدؤء وكل شي بس احم الحقيقه المُره ان حركاتها العنكبوتيه و الأخطوبويه تعكس الحقيقه الملائكيه... بس لا تخافوا البنت ما تعظ.. سميناها كاظمين بعدان عرفنا ان امها اول ما جابتها على هالدنيا..الاهل تسابقوا على تسميتها فتطوع احد من الاهل (ما ادري خالتها او عمتها) وقالت سموها كاظمين!! ...>> تحاول تكتم الضحكه .. المهم وطبعا ما سموها كاظمين.. بس من يوم ما عرفنا السالفه كرهنا البنت في هالاسم و كلنا صرنا ناديها به!

نونو نت: احم يعني مبين من الاسم ما دام فيه كلمه نت يعني مدمنه نت! هي اختارت نونو اسم لها بس انا اضفت نت للاسم!! لان بصراحه اذا النت مو موجود عندها تصير بغرفتهم حاله تكهرب غير طبيعيه.. هي بنت تحب تقرأ كثير لكن مجنونه بعد عليها حركات بس تعبر عنها!!! عاد إلا الابتسامه حقتها الي تحس ان فمها راح يتشقق منه ...بس ما نستغنى عنها..

ريمي: عاد ريمي كانت راح تضارب "نونو نت " على الاسم ...ليييييييييييش؟ لان الاخت نونو نت قالت خلينا نسميها "الهيدرا" قلت لها ليش قالت لانها من الرخويات!!! الحمدلله والشكر بس.. طبعا صار صراع و قالت "ريمي" سموا نونونت " الحوله" طبعا في النهايه توصلنا للاسمين والحمدلله لم يكون هنالك اي ضحايا.... هي زي ام البنات مررررررره حنوووووووونه! ماشاء الله عليها ... و احم اكبر خوافه في العالم! اذا احد نادى اسمها بطريقه شوي غير "تنفج" و تتغير ملامحا ... بس يضحك!

الدافوره (الدريسه او النيرديه): اعتقد ان الاسم يعبر عن مكنون البنت >>>> بتذبحني... لا بس هي دافوره كول ( احاول ارقع) المهم بنت صراحه انا لما اشوفها تذاكر احس نفسي راح ابكي!! اعتقد اسبوع من مذاكرتها تساوي مذاكرتي لسنه كامله في الثانويه العامه (بس ما شاء الله عليها) بس طبعا في جامعتنا الواحد يضطر يصير شبه دافور عشان يعطي لنفسه امل يجيب سي ولا سي "زايد" احم.. المهم البنت هذي اذا في يوم ذاكرت بزياده تصير عندها هلوسه مخيه.. وما اعتقد ان احد يبغى يكون حوليها وقت الهلوسه..لانها اما تضحك على كل شي (حتى لو نظره) او تبكي وتضحك!!! طبعا صارت عندنا مناعه من هالشي.

.............................................خلصنا من الشله الي فوق

الجميله , و بي بي سي (روم ميتس بعد) احم المهم

الجميله: طبعا حصلت على اللقب بعد معاناه لان الروم ميت حقها (بي بي سي) كانت تبغى الاسم ( بس كانت تتمسخر)و الجميله ما كانت تبغى بعض الالقاب كـ فيدو ديدو و المسطره.. ..لانه على قولتها خا يس
فأتفت مع نفسي ان اسميها الجميله ...! المهم البنت حلوة و هبله! بس طيبه لكن اللللللللللله لا يوريكم اذا فصلت..(يعني فيوزاتها ضربت) تتغير تتحول لوحش مهبول بس.. ومشيتها تتحول الى مشيه كنغر و ضحكتها الى ضحكه فار و ولن اقول الباقي حفاظاً على مشاعرها( ارحمني يا مشاعر).. اهم هوايتها سماع الاغاني الهابطه مثل : رجب: لهيفاء وهبي
العب:مايا ,,, وغيرها من الاغاني الي ما اعرف من وين بالضبط جابتها!!

بي بي سي: اعتقد الاسم يظهر صوره كافيه عن المقصود.. اذا اي احد في شلتنا يبغى يوصل اي معلومه في اقل سرعه ممكنه فالحل هو (( الاخت الكريمه بي بي سي)) انت بس قولها فلانه طاحت السكن كله يعرف في ربع ثانيه >> (تعبير مجازي ) بس هالبنت من اطيب البنات على وجه الارض لا من اجن البنات على رقعه الارض... ممكن تضحكها بسهوله... يعني اذا احد فاقد الامل في ان عنده حس الفكاهه والتنكيت.. يروح لها ويحس نفسه اكثر واحد يضحك بالعالم.. مره وحده بإجازه كذبت عليها "هتلر" وقالت لها ! !
انها انخطبت.. وطبعا الاخت بي بي سي ما قصرت و انهالت عليناالاتصالات..

بي بي سي: الوووو اقووول ما عندي رصيد يكفي المهم اقولك "هتلر" انخطبت يلا باي!!
طبعا هالاتصال وصل لنا كلنا .. وكانت كل وحده فينا في بلدها ووسط اهلها (حتى الي كانت بفرنسا وصل لها الخبر).. وانبسطنا كثيييييييييير...
بس فجعه قصدي فجأه بعد كمين ساعه تتصل البنت وتقول ترى "هتلر" كانت تكذب علي .. وفي ذيك الاجازه صارت بي بي سي
تلقب بي "بي بي سي" احم

.....
الروم ميتس الثانيين

بدويه , هتلر , و يوكو

بشرح عنهم بالمختصر.. كل وحده ما تشبه الثانيه في ولا ولا ولا ولا شيي! ابداً
بدويه: هوايتها الشعر شرب القهوه والضحك و اي شي يخص الريجيم مع انها مو متينه.. بس فيها هوس! و احلى شي لمن تتكلم انجليزي..ز مافي منها اثنيييييييين!
هتلر (مس كريزي): هوايتها الاغاني الاجنبيه وحبيتن عربي والنوم (طالع من يتكلم) و شرب (سن ابل) والتهزيئ للي يستحق (طبعا يخافوا منها ما عندها لعب عيال)! فعشان كذا نادوها هتلر.. لا ترحم اذا احد حاول يصحيها من النوم او يزعجها!
يوكو: هوايتها الاغاني بشكا عام النت النطنطه والاستهبال والرسم ..عاد هذي من عالم ثاني ليه سميناها يوكو.. الاسباب معنيه! احم

....................
جينا لبنات شارع الخليج!

رجه , والدكتوره , نانسي, كلييين, نانسي,نتفه, توباكه , دلوعه و حضرتي (محششه ) عاد نحن الصراحه كل وحده فيها شي غير عن الثانيه مع اننا نتشارك بالاستهبال... طبعا كانت الاخت كليييين من أهداء بنات السكن صارت من شله المشاعبات! عاد اهم يوم لمن اشترت "سبيكرز" للاب توب ولا وحده مننا صدقت انها اشترتهم... لا و لمن شغلت الاسبيكر استوعبنا السالفه.. اهم شي اننا كلنا متفقين على سالفه الاغاني العاليه!! المهم...نتشارك انا و الاخت دكتوره بحب محمد عبده .. ووتشارك كلييييين مع رجه بهوسهم في النظافه.. يعني يا ويلنا اذا دخلوا غرفه من غرفنا و شافوا قطعه "كيلينكس" على الارض! او رشه ملح على الدج!! يعني نهايتناااااا!!
تشترك نتفه و الدكتوره و رجه في حب تركيب " البزل" انا بس اطالعهم و اقول متى اكسره!! المهم

و نتشارك انا و كليين و نانسي و اغلب البنات في حب الرقص و الاستهبال الاليم.. طبعا رقص "خربطيشن" لا تصدقون يعني!
في بلاوي غير بس ما اتذكرها...
اهم شي فينا الي هم مشترك انه لمن ما يشتغل "الام اس ان" تسمع صراح من كل غرفه
لاااااااااااا لاااااااااااا لااااااااااااااااا لااااااااااااااااااااااااااااااااع!
...................................
ترى في شلل غيرهم منها شله بنات العم
بنات العم 1
و بنات العم 2

بنات العم 1 و بنات العم 2 هم بنات هم و روم ميتس
اربع بنات كل وحده لها شخصيه ما تشبه الثانيه في ولا شي
وحده هايه ووحده رومانسيه ووحده مجنونه ووحده فيها انفصام في الشخصيه(مره تقول مستحيل ارقص بس ترقص على الهندي عادي) احم عاد هذول قصه في عالم ثاني!

المهم خلصت من التقارير لهذا اليوم
استنوا بكره او الي بعده
راح اكتب عن طلعتنا لخارج السكن!

مع السلامه
وهالله هالله بالردود


Sunday, February 05, 2006

السلام عليكم... ( يقولون السلام قبل الكلام لاه)


مثل ما يقولوا الصراحه راحه! والواحد لمن يكون صريح يرتاح... صح ولا لأ؟؟ (ادري صح) احم المهم.... انا في يوم مُلهم مثل هاليوم, قلت لنفسي يا "دودة"....>>>( اسمي المستعار يعني!) ايش رايك تكتبي عن يوميات بنات السكن او بالأصح يوميات سجيناات اللإصلاحية!
مثل نحنا ما نسميها....لان بالصراحه الأكشن الي يصيربالسكن شي غير طبيعي ...(ينفع مسلسل هندي ) ...السكن عندنا شي خيال! طبعا مو من الناحيه الإيجابيه ,بس نحن كبنات مغتربات و بسكن يجنن ويوفر لنا كافه سبل الراحه والإسترخاء... >>> (طبعا فاهمين قصدي العكس) المهم نرجع لمحور حديثنا... بما اأننا في مكان بهذي الفضاعه اكيد تصير أشياء ترطب جو السكن شوي...و ياما وياما رطبنا جو الإصلاحيه الكريم قصدي السكن الدافئ! !! .. فحبيت أشاركم قصص يوميات بنات السجن المركزي..لإتاخذوا العبره والفائده منها و تستفيدوا من بعض طرقنا في الترفيه عن النفس و طرق غيرها كالنصب والاحتيال ((البرئ)) طبعاً...
تقريباً كل اسبوع او مرتين كل اسبوع نشاركم مغامرتنا... >> الي يسمع يقول داخلين حرب!! هو من ناحيه حرب هو جهاد في سبيل العلم .. "فديتني احاول اهون الموضوع"... المهم انا ما احاول اكون زي رجاء الصانع و اعمل ي روايتها (بنات الرياض) الي بصراحه في رائئ الشخصي فاشل!! وحده وفضحت صاحباتها و بس!!...هنا غير ,مقصدي احط شوي من مغامراتنا (مع علم البنات طبعاً مو من وراهم) فديتني ترى اعرف الأصول... المهم في اول كتابه لي راح اكتب عن السكن والشخصيات الي فيها طبعا.. فبدينا بسم الله..

اولاً قواعد و قوانين السجن المركزي او ما يسمى بالإصلاحيه:

1. على طالبات السكن المقيمات ان يرتزوا في السكن طوال ايام الاسبوع و مسموح بطلعه واحده فقط كل نهايه اسبوع!! عاد هذا القانون رهيب يحسسونا بالدلع الشنيع! يخافوا علينا فديتهم بس...وطبعا لزياده الدلع يوصلونا بباصات احم قصدي (همرز) الصراحه يعني ما اقدر اعبر عن مدى امتنانا كطالبات بهذي الخدمات الجباره... واحلى ما في الموضوع (الهمر الأصفر) الي يجيبونه في الاحوال الطارئه وهو طبعا اكبر انواع الهمر واحلاهممممممم.. خليها مستوره بس

2. من ترغب بالخروج عن طريق المواصلات العامه (يعني تكسي) عليها ان تخضع لجميع انواع الذل.. طبعا لازم" ولي الأمر" يرسل فاكس ولين ما يجي حضره سعاده الفاكس تنتظر المسكينه المغلوب عليها البنت ...يمكن يقولوا نبغى نتصل بأهلك ..المهم ان نص فاكسات السكنات عندنا خربانه و معفنه يعني المسكين ولي الامر يرسله فوق الخمس فاكسات حتى يوصل واحد منهم.. كان في شي اسمه تصريح مع صديقه طبعا الغوه تصريح الاهل فقط للأهل من الدرجه "الأولى" اخر عمرنا صار للأهل درجات..تحولنا طيارات ونحنا ما نعرف!! , وبعد كان التصريح اكثر من يوم بالاسبوع صار بس مره بالأسبوع وفقط للساعه 9 المساء يعني اذا ما جت قبل التسع البوابات عليها السلااااااااااام!


3. ممنوع دخول اي كائن حي غير الطالبه السكن ... مثلا امي واختي ممنوع عليهم منعا باتا دخول السكن!! (ترى حتى في السجون مسموحه الزيارات) بس نحنا غييير يخافوا عينا حتى من اهلينا...حياتي عليهم!! اذا كل انواع القطط المتوحشه وال ديناصورات المنقرضه"الحشرات الغريبه" تجي تزورنا في جميع الاوقات!

4. احلى قانون سمعته في حياتي هذا... يمنع منعاً باتاً احظار اسلحه بالسكن!!! ترى والله قويه وين نحن! صدقوا ذول اننا بحرب. اول ما طلع هالقانون جلست افكر يالله وين احط الحين سكينه الجبن حقتي!! المهم ما علينا.

5. الكلينكووووو (عاملات النظافه)..هذول في كفه والسكن كله في كفه ثانيه... تنظف الغرفه بس مره بالأسبوع..هم قالوا مره بالأسبوع بس ترى مره بالسمستراو بالشهر اذا كانت البنت حظها طاق السما!... بس الحقيقه المره هي ان ذول العاملات لو تنادي عليهم سنه يجووك بالذل العصيييييييب بس اذا راحت الوحده تهويها بخمس دراهم او عشر ما شاء الله تجي ركيض!! كانها في سباق خيول..لا لا و الأرضيه تتحول مرايا!! عادي اشوف وجهي عليها!

6. جمعيه السكن... و ما ادراك ما الجمعيه!! ترى حرام يسمونها جمعيه سموها "جم" او "عيه" بس جمعيه كبير عليها!!! المهم تفتح الجمعيه من9الصبح الي 10 المساء طبعا هو العكس تفتح 10 الصبح و تصك 9 المسا... عااااادي, لا و يوم الخميس تصك الساعه 4 المسا و يوم الجمعه تفتح 4 المسا... (طبعا نحنا المقيمات بنات البطه السودة) يعني اذا الموطنات مو موجودات بالسكن نحنا ما لنا وجود!!والله حاله.


7. طبعا محطات التلفزيون ممنوعه بالغرف ما عادا للمشتركات بالخدمه.. هم 13 قناه كل قناه تسد النفس اكثر عن الي غيرها على راسها السودان و سبيس تووون!!! لا وادفعي 100 درهم..على اييييييييش يا شيخ!! طبعا نص البنات مو دافعات ..(ترى نعرف نحط الواير حق التلفيزيون ونعمل "سيرتش" ) مساكين ترى

هذي اهم القوانين و قواعد بالسجن المركزي حقنا..بس عادي ما ابغى ازيد لاني راح احرق نفسي وانا اتذكر هالقوانين!!

المهم شخصيات السكن:

نحنا عباره عن شله متفرعه لعدت شلل... ما في أبراء وا حسن منا ,وعلى نياتنا ترى بس مين الي يسمع!

المهم انا دودة زي ما قلت
راح اقول كل وحده و النك حقها و ليه سميناها كذا

راح ابداء بالترتيب العشوائي ... ((للمعلوميه راح تزيد الاسامي عما قريب)) ذوا اول دفعه

كاظمين, نونو نت ,دافوره, و ريمي ذول "روووم ميتس" >> كلمهم مع بعض كل بنتين بغرفه! ذول فَلللللللللللللله
هتلر, بدويه و يوكو >>> "روم ميتس" بعد بس كل وحده غيييييييير عن الثانيه..كأنك جبت كل وحده من كوكب
سي إن أن, الجميله >>> "روم ميتس" بعد بس الله لا يوريكم! انواع الجنون
رجه, الدكتوره,نتفه,كلييين,نانسي,دودة المحششه(انا),>> نحن عاد كلن بغرفه في نفس الممر (ممر الخليج) وكل وحده اهبل و اجن من الثانيه! عااااادي..

ملاحظه: في احتمال يتغير اسم كمين بنت... ترى صارت مصارعه ثيران لمن قلت لكل وحده ايش هو اسمها المستعار!! هذا غير البنات الي اصلا ذول الاسماء هي القابهم الاصليه... المشكله يقولون ليه تختارين لنفسك اسم حلو.... الحين دوده اسم حلو؟؟! ذا كان اسمي من قبل 6 سنوات!! بس احتمال يتغير ل ( ام براطم) على قوله الاخت بي بي سي

والباقي قادم
:p

المهم انتهت رحلتنا هنا!
اي احد عنده اي استفسار عن مشاريعنا القادمه او عن اي عضو بالجماعه
يعطيني رنه على "الكومنتس" المهم اخليكم الحين...

ملاحظه 2: تم تغيير اسمي من "دودة" الي "محششه"! في احد قالي انتي محششه لاني ما انام و اضحك على كل شي!!

مع السلامه